Monday, August 20, 2007
Human Security Act Ulit
Human Security Act o mas kilala sa tawag na HSA… Diba? Napakaganda basahin at pakinggan? Kung wala kang alam tungkol diyan ay iisipin mo na tila maganda ang nilalaman ng batas na yan. Iisipin mo na ang hangarin ng batas na ito ay protektahan ang mga mamamayan at pangalagaan ang bawat isa sa atin. NGUNIT… ito na po ang ngunit…Nakakatuwa at nakakatawa dahil kung ano ang ginanda ng katawagan sa nasabing batas na Human Security Act ay ang di kaayun-ayon na mga probisyon na nilathala ng nasabing batas. Aakalain mo na napakaganda ng batas na ito pero kung pag – aaralan mo ng mabuti ito, kakikitaan ng maraming butas ang Human Security Act. Susubukan kong magbahagi ng ilang probisyon na nabanggit sa Human Security Act na para sa akin ay mga butas na dapat tanungin , suriin, pag-aralan at bigyan ng pansin ng mamamayan.Una sa lahat, dito sa Human Security Act, ang paglalarawan ng isang terorista ay napakasimple. “A terrorist is someone who causes fear.” Napakasimple ng paglalarawan sa isang terorista. Ito ay isang kahinaan sa nasabing batas dahil pinapakita na halos lahat o kahit sino sa atin ay puwedeng maging isang terorista. Siguro, maganda ang hangarin ng batas mismo upang mawakasan na ang banta ng terorismo sa ating bansa pero sa aking pananaw, hindi tama ang Human Security Act.
Sumunod na dito ay ang pagbabawas ng “privacy”. Ayon sa Human Security Act, papayagan nito ang “wiretapping” kung saan maari mong malaman ang lahat gamit ang makabagong teknolohiya. Isa itong malaking kamalian dahil ang bawat mamamayan ay may karapatan mamuhay ng pribado. Masasabi natin na ang Human Security Act ay tinatanggalan ka o kung hindi man ay binabawasan ang iyong karapatang pantao at isang dahilan na dito ay ang puwede pasukin ang iyong pribadong buhay. Dahil dito, hihina na ang ating media at mawawala na ang freedom of the press. Isa pa naman itong paraan upang malaman natin ang opinyon ng bawat tao. Sa tingin ko mawawalan na ng saysay ang pagbabalita kung hindi tayo magiging bukas sa ating mga iniisip. Dahil sa batas na ito, magiging limitado na lamang ang ating mga sasabihin. Ang media ay iiwas na magbalita ng mga bagay na magbibigay takot sa mamamayan kung sakaling mapatupad ang Human Security Act. Ito naman ay sa aking palagay lamang. :)
Isa pang pagbabawas ng karapatan pantao sa nasabing batas ay ang agarang pagaaresto sayo kung ikaw ay pinaghinalaan. Sa aking opinyon, hindi na makatao ang ganoong pamamaraan. Diba nga, lahat ng tao ay may karapatan at dapat hindi iyon tinatapakan ng kahit sino.
Isa pa pa sa pinakamalaking katanungan tungkol sa Human Security Act ay kung bakit hindi dito kasama ang gobyerno sa uri ng terorista. Hindi binibigyang pansin sa Human Security Act ang mga puwedeng gawing gawaing terorista ng gobyerno. Kung iisipin natin, ang batas mismo ay isang uri na ng terorismo dahil ito ay nakapukaw ng pansin at nabalita na may kasamang mga isyu at katanungan.
Hindi dapat binabaliwala ang karapatang pantao kahit anung bagay pa man ang inuusig. Lahat tayo ay parepareho at wala tayong karapatan maging mas mataas sa iba. Karapatan ng bawat mamamayan ang dapat unang pinapahalagahan. Hindi naman tayo mga hayop na kapag napagbintangan lamang ay dadakpin at kung nagkamali ay bibigyan nlng ng kung anu – ano para makabawi. Masyadong maraming madidismaya sa batas na ito dahil sa mga nakatalang probisyon dito.
Sa aking opinyon, maganda ang hangarin ng Human Security Act. Kahit sino naman ay matutuwa na mawala na ang terorismo sa ating bansa at syempre mas masaya sa buong mundo pero panaginip lang ito at mananatiling panaginip. Sa mga probisyong sinaad sa Human Security Act, masasabi ito ay pagpapakita ng kapangyarihan ng gobyerno sa mamamayan. Maihahalintulad mo ang Human Security Act sa Martial na pinatupad noong panahon ni Marcos. Parang kamag-anak na kung maituturing ng Martial Law ang Human Security Act.
Ang Human Security Act ay masasabi kong isang paraan ng lantarang pagmamalabis at pagpapakita ng bulok na sistema ng gobyerno. Halatang halata sa Human Security Act mismo ang isang kamalian ng isang batas. Punong – puno ng butas ang nasabing batas. Bago pa lang ito naipatupad ay maraming intriga na ang sumalubong ditto. May mga grupo na rin ang nagtanong tungkol sa batas na ito na ang tanging hangarin lamang ay malinawan tungkol sa Human Security Act. Ang iba naman ay tinatanong ang mga probisyong nakalahad sa nasabing batas. Tinutuligsa nila ang bawat punto ng batas. Ayon sa kanila, napakasimple raw ng pagkakalarawan sa mga puntong ito. Sa halip na makatulong ang nasabing batas ay nagbibigay ito ng mga usapin at isyu sa mga taong ninanais mawakasan ang terorismo. Ang Human Security Act ay napaka-“one-sided”. Para kasing lahat na puwede maging terorista maliban sa gobyerno. Diba ‘dun pa lang, makikita na natin na hindi makatarungan ang batas na ito? Ayon sa mga kritiko, iyon ang isang pagkakamali ng batas na ito sa kadahilanan na ang ginagawa ng gobyerno ay isa ring banta ng terorismo kung pagbabatayan natin ang ibig sabihin ng terorismo sa Human Security Act.
Ang comment ko? Magkamag-anak nga ang Martial Law at Human Security Act.
Pati pala batas ngayon ay nanganganak na. :)
-JOHN DIO ~_~
posted by group3 at 2:22 PM
Sunday, August 19, 2007
Human Security Act
Madalas na nating naririnig ang salitang terorismo pero hanggang ngayon ay wala pa rin tinatanggap na kahulugan talaga nito. Ang pangyayari noong 9/11 ay isa sa mga alam na alam ng mga tao na terorismo. Ito, ang terorismo, ayon sa batas na human security act ay mga gawain na nagbibigay ng takot at panic sa mga tao, at pag give in ng gobyerno sa unlawful demands. Ang human security act o Republic Act No. 9372 ay batas na ginawa dahil laganap na ang terorismo sa kasalukuyang panahon. Ang batas na ito na ang tinatalakay ay terorismo ay isa sa mga usapin at pinagtatalunan ngayon. Ang kanilang pagpapakahulugan ay hindi malinaw kaya’t ang salitang terorismo ay maaaring magkaroon ng maraming kahulugan. Ang pagpapakahulugan ay depende sa taong nakakita o nakarinig nito.
Maraming tao ang may ayaw sa batas na inilabas tungkol sa terorismo dahil pati ang mga estudyante, mga blogger, mga journalist at iba pa na malayong maging terorista ay maaaring mapagbintangan na terorista. Sinasabi kasi sa batas na ito na terorista rin ang isang tao na may kaalaman sa plano o kahit na ano tungkol sa mga terorista. Paano na lang kung wala naman silang balak maging parte talaga ng terorismoat hindi sinasadya na malaman nila? Hindi ito makaturangan kung ganun. Isa pa ang gobyerno ay hindi maaaring kasuhan ng terorismo. Maaaring ang isang myembro ng isang grupo ng terorismo ay nasa gobyerno.
Isinasaad rin sa inilabas na batas na ang isang tao ay maaaring arestuhin kahit na siya ay pinaghihinalaan lang at wala pang sapat na ebidensya. Paano na yung presumption of innocence? Pwede rin ma-house arrest ang isang tao kahit na walang matibay na ebidensya na siya ay guilty. Hindi siya maaaring gumamit ng cellphone, computer o kahit na anong kagamitan na instrumento ng komunikasyon. Pwede siyang makulong hanggang tatlong araw. Ang human security act ay masyadong malupit.
Bibigyan ng 500,000 compensation ang taong napaghinalaan sa bawat araw na siya ay nakakulong nang dahil sa maling hinala. Makabubuti ito para sa taong pinaghinalaan dahil malaking halaga ng pera ang kaniyang makukuha pero sa bansang Pilipinas ito ay makakasama. Mababawasan ang pera para sa mga tao at maipambabayad ito sa naakusahan. Mababawasan ang pera ng dahil sa maling akala at dahil sa batas na human security act. Masyadong malaki ang halaga na ibabayad nila. Dapat bawasan nila ito dahil kailangang-kailangan ng Pilipinas ang pera.
Sinasabi rin sa batas na maaaring tignan ang bank accounts kung pinaghihinalaan na yung pera ng isang tao ay ginagamit para sa terorismo. Paano na lang kung mali sila? paano na ang confidentiality nung tao? Dapat ang mga ganitong bagay ay hindi na nila sinasama. Dapat ay bigyan naman nila ng privacy ang mga tao. Mas stringent pa ang law na ito kaysa sa Anti-Money Laundering Act of 2001. Sa tingin ko hindi na kailangan tignan ang bank accounts lalo na kung pinaghihinalaan pa lang ang isang tao at wala pa silang nakukuha na sapat at matibay na ebidensya.
Ang human security act na batas na pinasa nila ay maraming “grammatical errors” na pwedeng maging butas. Halimbawa ay may anumalyang nangyayari, maaari mapa-ikot ng mga terorista ang batas at hindi sila maaresto kahit na may mga ginagawa na sila na makakasama sa mga tao. Maaaring makagawa ng anumalya ang ilan kung sila ay magaling sa pagpapaikot ng batas pero kahit na ganun ay hindi sila maaresto dahil sa pagiging magaling nila. Karaniwan pa naman sa mga terorista ay magaling sa mga ganitong bagay at sanay sa pagpapaikot ng mga bagay-bagay at mga tao.
Ang human security act ay isang eksaherado at hindi organisadong batas. Sa kaunting bagay na magawa ng isang tao ay maaari na siyang mapagbintangan o makulong nang panandalian dahil sa paghihinala lang na siya ay parte ng isang grupo ng mga terorista. Hindi ito makatarungan sapagkat ang isang tao ay maaaring arestuhin kahit na walang matibay na ebidensya. Paano na lang ang mga taong hindi aware sa batas na ito? Maaari silang mapagbintangan sa kaunting pagkakamali na nagawa nila na wala silang kaalam-alam ay masama na pala.
Makakabuti ang human security act sa atin sapagkat mababawasan ang mga terorista at ang terorismo ay hihina subalit ang batas na ito ay marami rin masama na maidudulot sa mga Pilipino. Pati ang mga taong hindi naman talaga kasama sa mga terorista ay maaaring makulong ng dahil sa maling akala. Isa pa napakalaki ng compensatin na sana ay magagamit pa ng gobyerno natin sa ibang bagay. Sa aking palagay mas maganda at makakabuti sa ating mga Pilipino kung aayusin pa nila ang nasabing batas. Dapat isipin nila ng mabubuti ang magiging epekto ng batas sa Pilipino pati na rin ang magiging reaksyon nila sa nasabing batas nang hindi magkagulo. Dapat ay tignan nila lahat ng anggulo lalo na ang makakabuti talaga para sa mga mamamayan ng Pilipinas.
-Lisette Ramos
posted by group3 at 9:01 PM
Hilakbot sa Administrasyon
Sa konteksto ng Republic Act (RA) No. 9372—Human Security Act (HSA) of 2007—ang terorismo ay nangangahulugang pag-uumpisa ng kaguluhan at pagdudulot ng takot sa karamihan upang pabagsakin ang gobyerno. Pero sa isang simpleng mamamayan, ito ay ang panggugulo sa katahimikan.
Noon lamang nakaraang Agosto 15, naitakda ang unang buwan ng naturang batas, na naipasa noong 15 Hulyo 2007. At nakapaloob sa batas na ang HSA ay: “an act to secure the state and protect our people from terrorism.” Pero ang batas ay parang babae na nagpupumilit na paggandahin ang sarili; paggamit ng mga kung anu-ano—makeup, pabango, matataas na sapatos at iba pa—upang itago ang kanyang kapangitan (Cruz, 2007). Kaya naman hindi na maikakaila na ang Pangulong Gloria Macapagal- Arroyo ay sinisimulan na ang paggamit ng kamay na bakal sa kanyang pamamahala.
Kung mamarapatin, tingnan man sa maraming angulo, ang pagpapanukala ng anti-terror law ay bunga ng dalawang insidente noong mga nakarang eleksyon. Isa sa mga ito ay ang “Hello Garci Scandal” noong 2004, na kinasangkutan ng pangulo at ni Commissioner Virgilio Garcillano. Ang nasabing iskandal ay naganap noong kainitan ng eleksyon, at naging kontrobersyal pa ito dahil ang nilalaman ng pag-uusap nila ay ang mga resulta sa eleksyon. At ang isa pa sa mga maaring dahilan ay ang pagkatalo ng karamihan sa mga kandidato ng administrasyon sa nakalipas na senatorial elections.
Mula nang maging epektibo ang batas, may mga isyu na umusbong agad ukol sa HSA, at isa sa mga ito ay ang invasion of privacy. Ayon sa ikapitong seksyon ng RA 9372, ang mga alagad ng batas ay may karapatang manghimasok at i-rekord ang mga usapang confidential, kung may pahintulot mula sa Court of Appeals (CoA). Hindi lang ang mga diskurso ang puwedeng pakialaman, puwede rin ang bank account/s ng inaakusahan, na siya namang nakapaloob sa ika-27 seksyon ng HSA. Sa simula pa lamang, paglabag pa rin ito sa karapatan ng isang tao na magkaroon ng private life kahit may permiso pa ang pulisya na nagmumula sa nasabing korte.
Ngunit hindi pa rin lubusang mababalewala ang nasaad na karapatan ng tao dahil mayroon pa ring anti-wire tapping law, kung saan ang lahat na i-rerekord na pag-uusap ay alam ng parehong partido sa diskurso. At kung sakaling malabag ito, may mga kauukulang parusa pa ring maipapataw. Hindi lamang ang anti-wire tapping law ang sumusuporta sa pagprotekta sa tao, kabilang dito ang ika-13 seksyon ng RA 9372. Tinatalakay nito na kung sakali mang may mga wire-tapped recording, hindi ito ilalabas para magamit bilang ebidensya nang walang pormal na liham na humihiling na magamit ito.
At kung tinutuligsa na ang HSA ay mapanghimasok, lahat ng batas ay sadyang ginawa para pakialaman ang buhay ng tao, ayon kay Allen Surla, vice chairperson ng Political Science Department ng Pamantasang De La Salle- Manila (Legados & Sta. Ana, 2007).
Kung gayon man na ang HSA ay may kaakibat na invasion of privacy, anupa’t mayroong anti-wire tapping law? Nasaad sa batas na ito na ang pag-rerekord ay dapat alam ng parehong tao sa diskurso; pero nilalabag ito ng anti-terror law dahil kahit hindi alam ng isang partido basta may permiso mula sa CoA ayos lang.
Kapansin-pansin din na ang RA 9372 ay kapaki-pakinabang sa gobyerno. Una, maari silang magpadampot ng kahit sino na pinagiinitan nila. At kung may hihingin ebidensya, maari silang gumawa ng pekeng rekording para mas idiin pa ang nasasakdal. Sa seksyong labingtatlo, sinasabi na ang pakikinig ng mga wire-tapped na usapan ay maaring hilingin ng Department of Justice (DOJ) mula sa CoA. Sa ganitong kaso, sino ba ang namamahala sa usaping hustisya sa bansa? Ang DOJ. Maaring may maganap na conspiracy sa pagitan ng dalawa. Ang isa pang manipestasyon ng pakikinabang ng gobyerno ay makikita sa isang sipi mula sa kahulugan ng terorismo, “...in order to coerce the government to give in to unlawful demand...” Hindi ba’t parang sila rin ang pinoprotektahan ng batas? Kung baga, sila lamang ang saklaw ng panggugulo ng terorista.
Sa kabilang banda, mayroon pa ring bahagi ang batas kung saan ang mga law enforcers ay hindi pinapanigan. Tulad na lamang nang nasa seksyong labing-anim. Isinasaad dito na may parusa sa mga interceptions o mga rekording na walang kauukulang pahintulot. Hindi lamang iyan, sa ika-47 seksyon ay nakasulat, kung sakali mang mag-imbento ng rekording, sila ay mapapatwan ng labindalawa hanggang dalawampung taon na pagkakabilanggo.
Kung minsan, hindi naihahatid ang mga “suspek” sa naangkop na awtoridad ng hustisya sa loob ng tatlong araw, at nang dahil dito napaparusahan ang mga law enforcers. Mapapansin halos kahawig nito ang mga habeas corpus proceedings.
Kahit pa, naniniwala pa rin ako na ang HSA ay pabor pa rin sa kagustuhan ng gobyerno. Pansinin ang ika-53 na seksyon ng batas. Sinasaad nito na ang anti-terrorism council ay bubuuin ng Executive Secretary, Secretary of Justice, Secretary of Foreign Affairs, Secretary of National Defense, Secretary of Interior and Local Government, Secretary of Finance at ng National Security Advisor. Kung iisipin, ang mga ito ay itinalaga ng pangulo. Sila na may kapangyarihang magbigay ng pananaw sa naturang batas, ayon sa ika-54 na seksyon. Nakapagtataka talaga at puro kaalyado lamang ng pangulo ang nasa konseho; walang oposisyon. Sa madaling salita, maaring magamit ito ng administrasyon bilang sandata para malupig ang kumakalaban sa kanila.
Ang Human Security Act ay niyuyurakan ang karapatan ng mga tao. Sa isang bahagi ng ikalabinwalong seksyon, ipinapahiwatig nito na maaring dakipin ang sinumang pinaghihinalaang terorista. Kung kaya’t sila ay nawawalan ng karapatang maging malaya. At kung sabihin man na mayroon kaukulang pahintulot na mula sa Anti-Terrorism Council, maaring ang taong hinuli ay pinag-iinitan ng administrasyon. Ang batas ay tuwirang nagpapakita ng awtoritariyanismo dahil ang pulisya ay maaring manghuli ng tao, kung saan puwede niyang bigyang pakahulugan ang mga kasalanan ayon sa kagustuhan niya (Inquirer, 2007).
Ngunit ayon nga sa ilang mambabatas na nagpanukala nito, hindi naman nila tinatanggalan ang mga tao ng karapatang ipahiwatig ang saloobin nila. At kung iisipin, ayon sa ika-24 na seksyon, ang mga huhulihing tao ay hindi sasaktan at pupuwersahin kapag iniimbestigahan o kinukuwestyon. Sa ika-50 na seksyon ng batas, kung sakaling manalo ang akusado, babayaran siya ng P500,000 ngunit wala pa ring makakapigil sa kanya na kasuhan ang mga nagdemanda sa kanya. Malinaw na hindi pa rin tayo mawawalan ng pag-asang makamtan ang hustisya.
Pero, ang batas na sinasabing magbibigay proteksyon sa tao ay kapansin-pansing nagdudulot ng kapahamakan sa kanila. Ang HSA, hindi man tahasang nagpapahiwatig, ay pinipigilan ang karapatan ng tao na sabihin ang nais nila—ang mga hinaing nila sa gobyerno (Inquirer, 2007).
Ang pamumuno ng presidente ay naging madugo, nang manungkulan siya, biglang lumobo ang bilang ng extrajudicial killings sa 863, meron ding 180 ang nawawala at 248 ang nakakulong. Ang pangdadakip nito ay sumisimbolo sa pagpapatahimik ng tao at katotohanan (Inquirer, 2007).
Sa katunayan, ayon sa artikulong “A song dangerous under Human Security Act” ng pahayagang Inquirer, mayroon nang Ten Commandments ang kasalukuyang administrasyon: (1) Huwag magsabi ng katotohanan, (2) Huwag isiwalat ang pangungurakot ng gobyerno, (3) Huwag nang maghabol sa hustisya, (4) Huwag ipaglaban ang karapatang pantao, (5) Huwag nang paglingkuran ang mahihirap, at sabay tatanungin kung bakit sila ganoon, (6) Huwag isiwalat ang dayaan sa eleksyon, (7) Huwag asikasuhin ang mga taong “wanted”, (8) Huwag nang mag-protesta sa pang-aabuso ng AFP at PNP, (9) Huwag sumali sa mga rally, at (10) Huwag nang subukang patalsikin ang pangulo.
Sa patuloy na patuligsa sa batas, mas marami pa ang isyu na lilitaw. Tulad na lamang ng sabi ni Allen Surla sa panayam ng The Lasallian, “[HSA is] a hodgpodge of existing laws.” Kapansin-pansin din ang kaguluhan sa mga nilalaman nito, kung iintindihin ng mabuti, mapapagtanto na ang mga probisyon sa batas ay nagkokontrahan lamang. Ang pagkakatatag ng batas ay patuloy na tutuligsain dahil ang pangunahing trabaho ng AFP ay protektahan ang sambayanan kaya nakapagtataka talaga ang pagpapanukala ng Human Security Act of 2007 (Cruz, 2007). Malamang ang pagpapanukala nito ay preparasyon sa pagpapalit ng uri ng pamahalaan—pamahalaang diktaturya sa kamay ni Arroyo.
Mga Sanggunian:
Cruz, Isagani. (2007). The histrionic security act of 2007. Sinaliksik 15 Agosto 2007, mula sa http://opinion.inquirer.net/inquireropinion/columns/view_article.php?article_id=80617
Inquirer. (2007). A song dangerous under human security act. Sinaliksik 15 Agosto 2007, mula sa http://opinion.inquirer.net/inquireropinion/letterstotheeditor/view_article.php?article_id=76562
Inquirer. (2007). Human security act is inhuman. Sinaliksik 15 Agosto 2007, mula sa http://opinion.inquirer.net/inquireropinion/letterstotheeditor/view_article.php?article_id=77017
Legados, Z. & Sta. Ana, F. (2007, August 6). HSA: For whose security? The Lasallian, vol. XLVII (3), pp. 1 & 9.
posted by group3 at 7:00 PM
Republic Act 9372, Martial Law na Naman Ba?
Usap-usapin ngayon ang isang bagong batas na inilabas ang gobyerno. Pinasa ng mga congresista at mga senador at siya namang inaprubahan ni Pres. Gloria Macapagal-Arroyo noong ika-6 ng Marso taong 2007. Ito ang tinatawag na Human Security Act of 2007 o ang Act No. 9372. Ang sinasabing batas ay ipinatupad noong ika-15 na Hulyo ng kasalukuyang taon din.
Simple lang naman ang layunin ng batas na ito - ang labanan ang terorismo o ang anumang banta nito sa bansa ang pangunahing layunin. Marapat na protektahan ang mga mamamayan at mga kagamitan ng bansa. Ito ay ginawa upang mapanatili ang kaayusan sa ating bansa. Ito ay idineklara ng mga tao laban sa kahit anung klase ng terosismo. Ano nga ba ang tinatawag na terorismo?
Sa diksyunaryo, ang ibig sabihin ng terorismo ay paninindak o pananakot. Sinasakop ng kahulugan ng terorismo dito sa batas ang mga sumusunod: (1) panunulisa at panghihimagsikan sa dagat o piracy and mutiny in the high seas or in Philippine waters; (2) rebelyon (3) insureksyon (4) kudeta (5) pagpaslang (6) pangkikidnap (7) paninira o destruction .
Sakop naman sa paninira o destruction ang mga sumusunod : (a) pagsunog o arson (b) pagkalat ng nakalalasong kalamnan o toxic substances (c) Republic Act No. 5207 o ang Atomic Energy Regulatory and Liability Act of 1968 (d) Anti-Hijacking Law (e) Anti-Piracy and Anti-Highway Robbery Law of 1968 (f) Illegal Possession of Firearms.
Ang batas na ito ay nagbibigay ng karapatan sa mga awtoridad na dumakip o hulihin ang sinumang napaghihinalaang isang terosista. Ayon sa batas, ang sinumang tao na mahuling may ginagawang pananakot ay maaaring manatali sa kulungan sa loob ng (40) na taon. Ibang usapan naman kung may kasamang kasapi dahil ang sinumang mahuling kasangkot ay ipapakulong sa loob sa 17 na taon 4 na buwan at 1 araw hanggang 20 na taon. Maraming mangyayari sa loob ng isang taon. Paano pa kaya sa loob ng ganoong karaming taon? Maski sinuman na may sinasabing kasngkot sa mga terorista ay hahatulan ng pagkabilanggo. Sa kabila noon, maari namang ikumpiska ang mga bagay na pwedeng mapagkuhanan ng edidensiya. Maaring irecord ang paguusap at pakinggan din ang paguusap sa telepono. Pinahihintulutan ng gobyerno ang mga pulis na gumamit ng mga instrumento upang mairecord ang usapin ng mga sinasabing terorista. Ngunit, hindi maaring irecord ang usapin sa pagitan ng mga abogado at kliyente, doctor at ang pasiyente, journalists at ang kanilang sources at confidential business correspondence. Ito ay nakakabastos sapagkat dapat magkaroon ng privacy ang mga nabanggit dahil ang usapin ay maituturing confidential. Ang pagsadyang pagsunog sa isang gusali o bahay ay naisama na rin sa gawaing terorismo. May mga negosyo na kapag nalulugi ay ginagawan ng paraan para masunog ang gusali o pagawaan nang paaksidente upang makakulekta ng fire insurance. Maaari ding gawin ito ng taong may galit sa isang tao o korporasyon at binabalak sunugin ang bahay, gusali o pagawaan ng kanyang kaaway. May mga tao din na wala sa hustong pag-iisip na nangha-hijack ng eroplano upang takutin ang gobyerno na ibigay sa kanila ang kanilang demand. Ang mga manggagawa na wala namang ibang paraan para humingi ng pagtataas ng sweldo kundi mag-rally sa Liwansang Bonifacio o di kaya sa Plaza Miranda ay maaari na ding ituring mga terorista. Sa madaling salita, hindi na mailalabas ang mga hinain ng mga mamamayan sa gobyerno. Ang batas na ito ay nagbibigay ng oportunidad na kontrolin ang bawat galaw ng mga mamamayan.
Ang batas ay maaring magdulot ng magandang resulta sa ating bansa. Kilala naman ng lahat ang MILF at ang mga Abu Sayyaf. Maaring ipinatupad ang nasabing batas dahil sa pangangamba sa mga naturang grupo ng mga terorista sa bansa. Naging biktima na ng nasabing mga terorista kamakailan lamang sina Angelito Nayan at Angelito dela Cruz. Hangarin ng gobyeno na hindi na maulit ito. Dahil sa batas na ito, masisiguro ng lahat ang katahimikan sa bansa. Mababawasan ang mga krimen dahil sa naturang batas.
Maaring maganda nga ang layunin ng batas ngunit maraming maapektuhan dahil sa pagpapatupad ng batas na ito. Sa kabila ng magandang naidudulot nito, marami rin ang hindi sumasangayon o tumututol dito. Hindi klaro ang depenisyon ng salitang teorista dito. Malawak masayado ang pagtukoy sa salitang terorista Maraming mga simpleng taong namumuhay sa bansa ang maapektuhan.. Hindi na magiging pribado ang buhay ng mga mamamayan dahil naka-wire tap na ang bawat diskusyon ng mga pinaghihinalaang tao maski sa telepono. Paghihinalaang terorista ang mga taong may nililihim kahit wala naman itong koneksyon doon. Ang mga mapatunayang may sala ay huhulihin maski walang warrant of arrest ang mga dadakip sa kanya. Ang mga napatunayan namang walang sala ay bibigyan ng limang daang libong piso bawat araw ng detensyon. Sa gayong lagay, nararapat nga bang maging isang batas ang Human Security Act? Anung klaseng pananakot ang maaring sabihing isang paraan ng terorismo? Sino nga ba ang maituturing talagang mga terorita? Ito ay ilang katanungan ukol sa batas.
Si Joma Sison, tagapayo ng National Democratic Front of the Philippines (NDFP) at pangulo ng International Coordinating Committee ng
International League of People's Struggle ay naglabas ng reaksyon. Sinabi niya na ang batas na ito ay parte ng labang pangkamunduhan na kasapi sa pasista at terorismong gobyerno na pinamumunuan ni Pres. George W. Bush ng Estados Unidos. Sa tingin ni Sison, ang Pangulong Arroyo ay isa lamang tuta na kayang paikutin o hawakan ng imperiyalistang Amerikano. Bukod dito, sabi si Sison ay ginagamit na daw ng gobyerno ang military, pulis , pwersang paramilitary at mga “death squads” para panakot o pandakip. Ginagawa na daw ito upang siguruhing mapalaganap ang ikaliligtas pampulitikal ng pamahalaang Arroyo. Maasahan daw ng mamamayan na gagamitin ng gobyerno ang mapangaping batas na ito bilang lisensya para labagin ang mga karapatang pangkatao.
Si Athena ay aming kinapayam ukol sa karagdagang impormasyon sa Human Security Act. Siya ay against dito pero yung ideya ng ng anti-terrorismo ay walang kaso sa kanya. Ito daw ay dapat paguukulan ng pansin. Ang Human Security Act ayon sa kanya ay tinugma sa Patriot Act ng Amerika. Ang Patriot Act ng USA ay pinasa noong 2001 matapos mangyari ang isang gawain ng terorismo noong 9-11. Sinasabing maaring hindi lang daw mangyari yung 9-11 sa USA kung hindi sa ibang bansa din.
Matapos basahin at suriin ang batas na ito, makikita na maaaring isipin ng taong bayan na ang R.A. 9372 ay isang prelude na magdeklara ng Batas Militar para ipagpatuloy ang pamahalaang Arroyo katulad ng nangyari nuong panahon ni Pres. Marcos.
Ang batas na ito ay may maganda ngang maidudulot ngunit mas madami ang masamang maidudulot. Maraming maapektuhan at dadami ang tututol. Marapat lamang na hindi maging abusado ang mga may kapangyarihan. Sana nga lang ay talagang hindi ipapahamak ng batas na ito ang nakararaming mamamayan.
Pinagsanggunihan:
Analysis: Anti-terrorism Act is a License for and Weapon of State Terrorism
By Prof. Jose Maria Sison
Batas Anti-Terorismo – Resipi para sa
Bagong Alyansang Makabayan (BAYAN)
www.bayan.com
posted by group3 at 5:24 AM
Human Security Act by Rendz Endozo
Ang Human Security Act, o mas kilala bilang Anti Terror Law ay ipinatupad noong Hulyo 15, 2007. Ang naturang batas ay ipanatupad kontra sa terorismo, upang mapanatili ang katahimikan at kapayapaan sa bansang Pilipinas. Nangangamba ang gobyerno sa terorismong dulot ng mga samahang maka kaliwa katulad na lamang ng New People’s Army, Abu Sayyaf, Raja Sulayman Movement at ng Moro Islamic Liberation Front. Ito ang magiging panlaban ng pamahalaan sa mga impluwensya ng terorismo sa bansa. Ang batas na ito rin ang nagtakda ng kahulugan kung ano ang terorismo. Ang terorismo ay isang krimen kung saan ito ay nagdudulot ng takot sa nakakarami.
Ang paglulunsad ng batas na ito na kontra terorismo ang nakatulong rin sa mga karatig nitong bansa na lumban sa terorismo. Nakatala na ang mga grupong Islam na tulad ng Jemaah Islamiya at Al Quida ang mga nagbubunsod ng mala teroristang gawain sa South East Asia. Sinasabing ang ipinatupad na batas sa Pilipinas na kontra terorismo ay malaki ang maitutulong upang masugpo ang lumalaganam na terorismo sa Asya.
Ang Anti Terror Law ay nagbibigay ng kapangyarihan sa awtoridad na arestuhin ang mga nilalang na may kahinahinalang kilos at may potensyal na maging terorista. Ang mga mahuhuling nagplaplano ng mga terorismong gawain ay kakasuhan ng sinbigat na kaso ng mismong pagsasagawa ng plano. Nilalayon din na panghimasukan ng awtoridad ang mga pribadong transaksyon ng mga mamayan para sa “intelligence” upang mas madaling matukoy kung sino ang mga terorista.
Masasabing maganda an gang nilalayon ng batas upang masugpo ang terorismo sa bansa ngunit tunay rin na masyadong malawak ang pagtukoy nila sa kung anu ba ang terorismo. Maraming buhay ng normal na nilalang ang maaapektuhan ng nasabing batas. Dahil dito ay tuluyang mawawalan ng “privacy” ang mga mamayan. Ang pagtatago ng sino mang tao sa isang sekreto ay maaring mapagkamalang nagplaplano ng isang gawain ng terorismo. At sakali mang mapagkamalan ang isang tao na may potensyal siyang maging terorista o di kaya naman ay tumutulong lamang sa terorista o kahit na ilihim ang nalalaman tungkol sa terorista ay maaring dakipin ng hindi na kainakailangan ng warrant of arrest, at ito ay magiging ligal. Maaring ihabla ang isang tao na isang terorista at dadakipin kagad ito ng basta. Magkakaroon din ng media block out, sapagkat kokontrolin na ito ng gobyerno. Madiin na ipagbabawal sa media ang magkaroon ng kahit na anumang komunikasyon sa mga makakaliwa.
Ang mga makakaliwa na rin ay maari ng ituring na terorista maging ang mga simpleng mamayang Pilipino lamang na mapayapang nag rarally sa kalsada upang upahayag ang kanilang mga hinanaing sa pamahalaan. Maakusahan din ang sinuman na magkaroon ng transaksyon o magkaroon ng komunikasyon sa mga pinaghihinalaang terorista. Maging ang mga bank accounts ay uusisain ng gobyerno. Masasabing ang lahat ng bagay na kompidensyal ay mapapasok na ng intelligence.
Dahil dito, kahit na nakakatulong ang naturang batas upang masugpo ang lumalaganap na terorismo ay marami ang tumutuligsa dito. Sinasabi ng ilan na ang naturang batas ay nag aalis ng karapatan ng isang tao o ang human rights. Ito ay dahil sa malawak na kahulugan ng terorista na isinaad sa batas. Maaring ituring na terorista ang isang tao at dakipin nalamang ito kahit walang ibidensya. Ang paglilitis din dito ay hindi malalaman ng iba pang tao kung kaya, maari nalang ipa salvage ang mga ito kahit hindi pa nililitis.
Sinasabi ng ilan na ang pag papasa ng naturang batas ay maihahalintulad sa pag didiklara ng Martial Law. Sa panahon ng martial law ay maraming naitalang mga makaka kaliwa na bigla nalamang nawawala at namamataan nalamang patay na. Ang mga mamayan din noong martial law ay sinasabing biktima ng human rights violation. Ganoong ganoon din ang mistulang mangyayari sa Pilipinas kung ipagpapatuloy ang pagpapatupad ng Human Security Act. Parehas na sinasabi ito na para sa ikabubuti ng bayan at para sa kapaypaan at kaayusan ng bansa, ngunit kung tutuusin ay nakakasama ito sa mga mamamayan. Halos parehas ito sa martial law sapagkat ang Hman Security Act na ipinatupad ng Pangulong Gloria Macapagal Arroyo ay hango talaga sa mga batas na ipinatupad ng dating Pangulong Ferdinand Marcos na ginamit upang maipasawalang bahalan ang mga karapatan ng tao at upang mapanatili ang kapangyarihan sa kamay ng kasalukuyang administrasyon. Malaking katanungan din ang bumabalot sa oposisyon kung bakit ipapatupad ang ganitong batas kung kailan mainit ang isyu ng impeachment sa pangulo.
Pinakaunang maapektuhan dito ay ang kalayaan ng mamayan ipahayag ang kanilang saloobin o pati na rin ang kanilang hinaing sa pamahalaan. Dahil sa panukalang batas na ito ay mawawala ang sinasabing Freedom of Speech sapagkat maging ang mga mamamayan na mapayapang nag aaklas sa pamahalaan ay maituturing na rin ngayon na isang gawaing terorismo. Sinasabing ang nasabing batas ay maari rin naman itong gamiting laban sa kalaban sa politika ng administrasyon. Dahil sa pag aalis ng karapatan ng tao sa malayang pamamahayag ay lalong lalakas ang kapangyarihan ng pangulo sapagkat wala ng tutuligsa at lalaban sa kanya. Hindi na niya maririnig ang mga hinanaing ng ordinaryong mamayan upang maayos ang kanilang kalagayan sapagkat maari silang kasuhan na isang terorista at maaring maipadakip anu mang oras. Hindi lamang mga sibilyan na lumalaban sa pamahalaan ang maaring ipadakip, maging ang mga taong simbahan, o kababaihan at kabataan ay maari ring ipadakip dahil sa naturang batas. Mas lalo nitong inaalisan ng karapatan ang mga manggawa, magsasaka at ang mga mahihirap. Bukod sa pag aalis ng Freedom of Speech ay ipinapasawalang bisa din nito ang Rights to Assembly ng mamayan.
Sa kabuuan ay ang Human Security Act, bagaman sinasabing para protektahan ang bayan sa mga terorista ay isang inderektang pag didiklara ng kinatatakutang Martial Law. Ito rin ay hindi naiba sa Proclamation 1017 na binatikos din ng oposisiyon. Ang pagtatag ng ganitong batas ay nagsisilbing palamuti lamang upang itago ang lihim na agenda ng pamahalaan na panatilihin ang kapangyarihan sa administrasyon. Iniiwas nga ba ng naturang batas sa kapahamakan ang mamayan, o ang batas pang ito ang mismong magpapahamak sa mga mamayan?
posted by group3 at 3:48 AM
Saturday, August 18, 2007
HSA: Human SCURRILITY Act of 2007?
Tunay ngang hindi gaanong malinaw ang HSA sa nakararaming mamamayan. Tila masyadong malawak ang kanyang sinasaklaw. Marahil, iyong iba’y ‘dinedma’ na nga lang ang batas at pinaubaya na lamang sa kung sinumang may nais pang pakialaman ito. Ngunit suriin natin ang nilalaman ng HSA.
Alinsunod sa Seksyon 3 ng HSA, ang sinumang lumabag sa mga probisyong ito: Article 122 (Piracy in General and Mutiny in the High Seas or in the Philippine Waters); Article 134 (Rebellion or Insurrection); Article 134-a (Coup d‘Etat), including acts committed by private persons; Article 248 (Murder); Article 267 (Kidnapping and Serious Illegal Detention); Article 324 (Crimes Involving Destruction; Presidential Decree No. 1613 (The Law on Arson); Republic Act No. 6969 (Toxic Substances and Hazardous and Nuclear Waste Control Act of 1990); Republic Act No. 5207, (Atomic Energy Regulatory and Liability Act of 1968); Republic Act No. 6235 (Anti-Hijacking Law); Presidential Decree No. 532 (Anti-piracy and Anti-highway Robbery Law of 1974); and, Presidential Decree No. 1866, as amended (Decree Codifying the Laws on Illegal and Unlawful Possession, Manufacture, Dealing in, Acquisition or Disposition of Firearms, Ammunitions or Explosives), ay siyang mapaparusahan sa salang terorismo.
Ayon sa Seksyon 6, ang sinumang maging accessory o madawit sa isang terorista o pinaghihinalaang terorista ay mapapatawan ng parusang pagkakakulong ng 10 hanggang 12 taon. Dahil dito, umalma ang mga doktor at nars dahil sabi nila, kung magkataong kanilang gagamutin ang isang sugatang manggagawa dahil sa pagrarally, na ayon sa batas na ito’y isang terorista, ay matatawag na silang sangkot sa terorismo kung saan maari din silang makulong. (HAHR)
Sa Seksyon 7 naman na pumapatungkol sa surveillance of suspects and recording of communications, pwede na ang paniniktik sa sinumang pinagsusupetyahang terorista sa pamamagitan ng pagmamatayag sa kanya at pagrerekord ng kanyang mga pakikipag-usap na kung saan ito ay isang paraan ng paglabag sa right to privacy ng isang indibidwal. (BAYAN)
Ayon naman sa Seksyon 19, maari nang arestuhin at ikulong sa loob ng 72 oras ang sinumang suspek sa terorismo nang walang utos mula sa awtoridad. Ngunit ayon sa ating Saligang Batas, nararapat lamang na mayroon munang mandamyento mula sa mga opisyales bago hulihin ang sinumang naakusahan. (BAYAN)
Sa mga nabanggit, may pagkamalabo nga ang Human Security Act. Sa Seksyon 3 pa lamang, tila ‘redundant’ na ito dahil sa pag-ulit sa mga naitatag ng batas na pumapatungkol sa terorismo. Gayundin, sa mga sumusunod na saksyon, patunay lamang na ‘vague’ ang batas (HAHR) at ginagawa nitong lehitimo ang paglabag sa iba’t ibang karapatang pantao. (Bulatlat)
Ang pinakaapektado sa pagpapatupad ng HSA ay ang mga manggagawang Pilipino. Hindi naman lingid sa ating kaisipan na nagsasagawa ng rally ang mga manggagawa upang maiparating sa gobyerno ang kanilang hinaing tulad na lamang ng paghingi increase sa sohod. Dahil tuloy sa batas na ito, nalalabag ang iba’t ibang karapatan ng mga manggagawa gaya ng pag-oorganisa at sama-samang pagkilos (EILER) na siyang lumalabas na taktika lamang ng gobyerno upang busalan ang isang bansang naghahangad ng kaayusan at katapusan sa korupsyon at kahirapan. (HAHR)
At sa huli,
“The Human Security Act will definitely not feed the hungry stomach of the poor, increase the wages of workers, nor cure the crisis in the health care system. It will just create a state of fear and paranoia among the people.” (HAHR)
“With the Terror Law in place, the threat to our freedom comes from the government and no other: the state itself becomes the terrorist.” (AGHAM)
References:
Republic Act 9372 (Human Security Act)
Doctors Lambast HSA: Martial Law Comeback Condemned
HEALTH ACTION for HUMAN RIGHTS (HAHR)
http://philippinecommentary.blogspot.com/2007/03/human-security-act-of-2007.html
Human Security Act: An Unnecessary Law
BY ALEXANDER MARTIN REMOLLINO
Bulatlat Vol. VII, No. 27
http://pinoypress.net/2007/08/14/human-security-act-an-unnecessary-law/
Praymer Hinggil sa Human Security Act
ECUMENICAL INSTITUTE FOR LABOR EDUCATION AND RESEARCH, INC. (EILER)
Batas Anti-Terorismo – Resipi para sa Di-deklaradong Batas Militar
Bagong Alyansang Makabayan (BAYAN)
State Surveillance and the Human Security Act of 2007
(AGHAM)
posted by group3 at 12:15 AM
Friday, August 17, 2007
HSA vs. HR
-Ang mga mukha ng terorismo"
Sino nga ba naman ang makakalimot sa isang teroristang atake na yumanig sa kasaysayan ng mundo. Mas kilala ito bilang 9/11 o ang pag-atake ng mga terorista sa World Trade Center ng Amerika. Eh bakit ko naman ba sinasabi ito,anung konek sa HSA? Sapakat sa pangyayaring ito nagising ang mga bansa upang bigyang pansin ang lumalang banta at panganib dala ng terorismo.
Nanguna nga dito ang USA sa pagpapatupad ng isang batas na naglalayong sugpuin at labanan ang terorismo, ito ang Patriot Act, at ang Patriot Act na ito ang sinasabing inspirasyon at idol ng pagpasa rin ng isang batas na may kaparehong layunin, wala ng iba kundi ang Human Security Act.
Pero bakit nga ba tayo’y lalayo pa sa mga pagbibigay halimbawa sa mga mukha ng terorismo eh kung sa sarili nating bansa eh laganap na ito. Natatandaan niyo pa ba ang mga ito: Rizal Day bombing, pagkidnap kay Gracia Burnham at sa asawa nito, pagpatay kay Benjamin de Jesus sa Sulu at marami pang iba. Ngayon ang malaking katanungang bumabagabag sa milyon-miyong Pilipino kabilang ako: Ang HSA nga ba ang kasagutan sa pagsugpo sa terorismo?
Waahhh!! Sa haba ng nilalaman ng HSA, sigurado ko walang magtitiyaga basahin ito ng buong-buo. Sige sa pinakasimpleng paraan na kaya ko ito ang HSA:
...Ang batas na ito ay unang batas sa ating bansa na ispesipikong umaaddress sa malateroristang gawain, ito rin ang nagbigay depinisyon sa terorismo bilang isang kriminal na gawain na nagdudulot ng takot at panic sa publiko. Ang batas na ito rin ang nagbibigay pahintulot sa mga may kapangyarihan na magkaron ng access sa mga bank accounts na maaring pinaghihinalaan na ang mga ito ay ginagamit sa mga gawain ng mga terorista. Sunod ay nagpapahintulot na i-detain ang mga pinaghihinalaan sa loob ng tatlong araw, at 40 taon lang naman ang kaukulang bilang ng taon na ilalagi mo sa kulungan. Pero oras naman na mapatunayan ka ikaw ay inosente at ikaw ay dinitained, bibigyan ka ng P500,000 sa bawat-araw.
Si Senator Juan Ponce Enrille ang sendaor na lubos na nasa likod ng batas na ito. Siya ang unang nagpanukala na magkarron rin ang bansa ng ganitong batas. At noong ika-19 ng Pebrero taong ito, ang House of Representatives ay niratipika ang Anti-Terrorism Law na nilagdaang ni butihing GMA upang maisabatas ang matagal ng ininitay na bill na maging isang batas. 172 miyembro ng majority sa kongreso ang na dumalo sa espesyal na dalawang-araw na nilaan ng kongreso ang bumoto para ito maaprobahan. Nilagdaan nga ito ni GMA noong ika-6 ng Marso upang tuluyan nang mabigyang daan ang pagsugpo sa terorismo.
"The new law is a landmark in the battle against evil waged by all freedom loving Filipinos and allies all over the world.- PGMA.
"The anti-terrorism bill is a commitment by the Philippine government to the international community." – Speaker de Venecia
Kasunod ng pagpasa ng batas na ito, hindi mawawala sa anino nito ang mga pagbabatikos, pagtuligsa, debate ng iba’t-ibang tao, sektor sa batas na ito. Napakadami na yata ang nagsabi na kesyo hindi ito makatarungan sapagkat maraming karapatang-pantao ang nilalabag at mayayapakan nito. Kaya nga ang naging titulo ng aking blog post HSA vs. HR- human rights.
Dahil dito ko tatalakayin ang mga sinasabi ngang "loopholes" ng batas na ito sa pamamagitan ng pagpresenta ng mga bagay na sinasasagasaan ng batas na ito.
- Ayon sa mga kritiko ng batas na ito, ang HSA na yata ang magbibigay ng napakalawak na sakop at kapangyarihan sa mag otoridad lalo na ang mga pulis at military., kung gayon ang HSA raw ang magbibigay daan upang magkaron ng abuse of power na siguradong magdudulot ng mga iba’t-ibang paglabag at pagyapak sa mga karapatang-pantao nating mga Pilipino. Isa pa ring tinuturong maaring maging dahilan ng abuso ng karapatan ay sapagkat kung paano binigyang depinisyon ng HSA ang terorismo ay napakalabo
- Ang Bill of Rights ang matinding nasasagasaan sa pagpapatupad ng HSA. Pero ano nga ba ang Bill of Rights? Ang bill of rights ay ang batas na naglalaman ng lahat ng ating mga karapatang-pantao. Kung gusto mo malaman ang karapatan ng bawat-isang Pilipino, dito mo makikita lahat.
- Unahin na natin ang karapatan na sinabi sa unang sekyon ng Bill of Rights na"No person shall be deprived of life, liberty, or property without due process of law, nor shall any person be denied the equal protection of the laws." ngunit sa HSA sinasabi sa SEC. 18. Period of Detention Without Judicial Warrant of Arrest na nangangahulugan na maaring arestuhin ang isang tao kahit walang maipresentang warrant of arrest ang mga pulis. Dito pa lamang kakikitaan na natin na nawawalan ang isang tao ng karapatang dumaan sa due process. Bago rin tuluyang maipasok ang isang tao sa prisinto upang makulong, mayroong panahon na tinakda upang maidala muna ng isang pulis ang kaso sa korte bago pa ipasok sa kulungan ang isang tao, iyon ay ang tinakda ng Bill of Rights ngunit sa HSA, inais na ang period na ito kung kaya’t maaring dalhin na kaagad sa prisinto ang isang tao may kaso man o wala at sa loob ng indefinite na bilang ng araw.
- Ayon naman sa section 2 ng Bill of Rights "The right of the peole to be secure in their persons, houses, papers, and effects against unreasonable searches and seizures of whatever nature and for any purpose shall be inviolable, and no search warrant or warrant of arrest shall issue except upon probable cause to be determined personally by the judge after examination under oath or affirmation of the complainant and the witnesses he may produce, and particularly describing the place to be searched and the persons or things to be seized." O sa madaling salita dito tinutukoy ang right to privacy. Sa HSA halos lahat ng karapatan ng isang tao ukol sa privacy nito ay tuluyan nang binubura ng HSA. Paano? Una, sa Sec.13-15, maaing buksan na ang mga package, o kaya’y envelopes . Sunod, Sec.27, may kapangyarihan na ang at alamin mga otoridad na buksan, pakialamanan ang mga bank accounts ng isang tao na taliwas sa Bank Secrecy Law.
- Sa section 8 naman sinasabi na "The right of the people, including those employed in the public and private sectors, to form unions, associations, or societies for purposes not contrary to law shall not be abridged." Nangangahulugang may karapatan ang bawa’t Pilipino na magtatag ng mga organisasyon ngunit sinasabi sa HSA sa ilalim ng Section 17, ang nag-rerestrict na hindi kaagad maaring magtayo o magorganisa ng grupo o organisasyon kaagad-agad. Ngunit, karapatan natin ito?.
- Pati na rin sa REPUBLIC ACT NO. 4200 o ang Anti-wiretapping law ang nagsasaad ang pagbabawal sa wire-tapping o pagpasok sa privacy ng komunikasyon. Ngunit sa sa ilalim ng HSA, seksyon 7 maari na itong gawin ng mga otoridad na pakinggan, makialam at irecord ang pribadong pag-uusap ng mga taong maaring paghinalaan na kakabit ng terorismo.
- Ang Revised Penal Code naman ang naglalaman ng lahat ng krimeng maaring gawin ng isang tao at kabilang na rin dito ang kaukulang parusa sa particular na krimen. Kasama nga rito ang mga kasong nilabag na may kinalaman sa terorismo. Kung tutuusin, lahat na ng krimen ay nakasaad na dito nangangahulugan ang HSA ay isang redaduncy, ika nga ni Athena. Ngunit ang nakasaad na krimen at kaukulang parusa sa Revised Penal Code ay nagkaron ng mga conflict sa HSA na nagdudulot ng pagkalito kung paano mo ba talaga paparusahan at ano ba talaga ang ipaparatang na violation.
Kung hindi ako nagkakamali, pangunahing layunin ng Anti-Terrorism Law o Human Security Act, ang protektahan, pangalagaan ang ating kaligtasan...
at hindi ang tapakan, yurakan at balewalain ang ating karapatang-pantao, hindi ba?! Hindi nga ba?!
*think about it, at dito natin lahat matatanto kung tunay nga bang para sa atin at para sa ating kailgtasang ang HSA....
sanggunian:
http://www.gov.ph/aboutphil/a3.asp
http://www.chanrobles.com/revisedpenalcodeofthephilippines.htm
http://opinion.inquirer.net/inquireropinion/talkofthetown/view_article.php?article_id=76703
posted by rizelle at 8:00 PM